Slametan Mbuak Mala ing Desa Solokuro

Tradisi slametan mbuak mala yaiku tradisi ana ing desa Solokuro Lamongan, biyasae diwiwiti kanthi bancaan.  Tuan rumah kang ngadakna slametan kuwi ngundhang bocah cilik akehe pitu dijak bancaan sega ambeng lan bubur werna pitu. Kang nduweni tujuwan kanggo mbuak mala lan uga silaturahmi antar tetangga sakiwa tengene.

Ing slametan iki ana sapiranti ubo rampai kayata Sega ambeng, Jangan kulupan pitung werna ana (Bayem, godhong menyok, kangkung, kecipir, jireng, lembayung, lan godhong kates), Sambel klapa, Lauk pauk, endhog pitik godokan akehe pitu, Bubur tawar pitung werna, Jajan pasar pitung werna ana (bongko, jumbleg, lepet, katol, gemblong, lemet, lan lempog), Sendok kang digawe saka godhong lontar lan Duwit.

Tata cara slametan mbuak mala inggih menika tuan rumah ngundhang bocah cilik akehe pitu banjur dikandhani yen niate ngundhang iku nylameti sakkeluwarga kanthi tujuwan supaya mala kang tau nimpa kaluwarga bisa mlayu adoh. Banjur tuan rumah ngengken sesepuh kangge miwiti donga yaiku surat al fatihah lan doa kaselamatan. Rampung donga tuan rumah ngengken bocah cilik sing akehe pitu kanggo bancaan sega ambeng lan bubur tawar pitung werna. Yen sega lan bubur kuwi mau isih nyisa si tuan rumah langsung mbuak sing adoh yaiku dibuak ing sawah utawa kali. Kang dipercaya malane ben ora mbalek maneh, ben kintir milu miline bayu. Nalika bocah cilik arep bali nang omahe dhewe-dhewe tuan rumah menehi endhog siji-siji, duwit, lan jajanan pasar gawe oleh-oleh kaluwarga ning omah.

Saperangan ubo rampai kang ana ing nduwur mau nduweni makna dhewe-dhewe kayata Sega ambeng lan kulupan pitung werna nglambangna masyarakat desa solokuro mayoritas dadi petani, dadi hasil makaryane dhewe kang digawe bancaan. Bubur pitung werna kang rasane tawar nglambangna raenake uripe bisa mlayu adoh. Endhog pitu nglambangna awal mula kehidupan. Jajan pasar nduweni tujuwan ngenalna bocah-bocah cilik, yen jajanan pasar ing desa Solokuro ana akeh banget lan luwih enak saka jajanan modern. Jajanan pasar uga jajanan kang sehat marga ora nganggo pengawet, pemanis, utawa pewarna. Godhong lontar nglambangna wong jawa dadi nyesuaikna ben cah cilik ngerti yen godhong lontar bisa di gawe sendok. Lan ing pungkasan, saperangan ubo rampai mau akeh sing jumlahe pitu, pitu kuwi nglambangna dina, yaiku ing seminggu ana pitung dina.