Tradisi Upacara Nyadran ing Giyanti Wonosobo

Tradisi upacara Nyadran inggih menika kegiatan rutin masyarakat desa Giyanti saben tahun yaiku nalika siji Suro. Miturut sesepuh desa upacara Nyadran mesti di pengeti kalian masyarakat Desa Giyanti kanggo wujud rasa syukur amerga keberkahan lan keselametan. Saderenge adicara nyadran biyasane masyarakat mbukak omahe kanggo adicara anjangsana lan silaturrahmi kanthi tujuwan supaya raket kaliyan tangga sakiwa tengene.

Upacara Nyadran diwiwiti kanthi:

1.      Nyadran ing makam

Nyadran nggadahi arti nekani makam leluhur kang dikeramatna. Inggih menika makam leluhur utawa pendhiri desa Giyanti. Kanthi gawa sesaji arupa tumpeng, endhog, buah-buahan, kembang setaman, teh, kopi, lan dawet.

2.      Tenongan

Tenongan inggih menika wadah kang digawe saka anyaman pring (bambu), digawe wujud bunder lan nduweni tutup bunder. Tenongan iki kanggo wadah panganan jajan pasar utawa pala pendhem kayata pohung, kacang brol, tales, gembili, lan liyane. Lan panganan kayata sega, lawuh, bubur, jagung, krupuk, lan ketimun. Panganan kuwi mau diwadahi tenongan banjur digawa kaliyan ibu-ibu lan para remaja estri kanggo arak-arakan nyang pendhapa Desa.

3.      Prosesi Upacara ing Pendhapa Desa

Prosesi upacara ing pendhapa desa diwiwiti kaliyan ndeleh sesaji ing ngisor wit ringin ngarep pendhapa desa. Pohon ringin kuwi diyakini dadi panggonan leluhur utawa danyang desa kang nduweni sumber banyu kang isih kasimpen dadi panggonan keramat utawa punden.

4.      Rakanan

Rakanan yaiku ngebyarna panganan kang ana ing njero tenongan. Para warga bebas milih panganan apa wae. Ing kana masyarakat padha rayahan panganan.

5.      Festival Emblek

Festival Emblek yaiku seni kuda lumping. Kang nggambarna para prajurit. Biyasane ngamek cerita Babad Kediri utawa Raden Panji Asmarabangun. Komposisi tari Emblek yaiku ana pitung penari. Dipun pandhegani siji pasukan jaran lan enem dadi prajurit. Properti kang digunakake kayata jaran kang digawe saka kepang (emblek). Senjata pedhang lan tombak cilik.

6.      Lenggeran

Kesenian topeng lenggeran kang dadi tontonan lan tuntunan. Kesenian iki ditampilna kaliyan Sanggar Seni Sekar Budhaya Wonosobo. Kesenian iki gabungan kaliyan tari Emblek. Biyasane ditampilna ping loro yaiku nalika dalu lan awan. Penari kuwi joget-joget banjur atraksi kesurupan mangan kembang setaman lan semprong.

7.      Wayang kulit

Wayang kulit digelar ing adicara pungkasan inggih menika kanggo malam penutupan ing ngarep omah Kades Giyanti. Wayang kulit iki dadi tontonan lan tuntunan masyarakat Giyanti.

Sumber :

http://www.javaisbeautiful.com/our-blog/nyadran-tenongan-ritual-giyanti-village-wonosobo-central-java-indonesia.html