Bawang Putih Lan Bawang Abang

Jaman biyen kuna, ana ing sawijine desa urip sakaluwarga yaiku rama, biyung lan cah ayu arane Bawang Putih. Kaluwarga mau dadi keluwarga sing bagyo. Nalika Ramane Bawang Putih pahalane mung dagang cilikan, nanging uripe rukun lan dame. Nanging sawijining dina biyunge Bawang Putih lara sing ora bisa ditulungi lan akhire ninggal dunia. Bawang Putih sedih pisan lan ramane uga.

Ing desa liya urip uga janda sing duwe anak sing arane Bawang Abang. Sawise biyunge Bawang Putih ninggal, biyunge Bawang Abang kerep maring omahe Bawang Putih. Biyunge sering nggawa panganan, rewangi Bawang Putih resik-resik umah utawa ngancani Bawang Putih lan ramane kandahan. Akhire ramane Bawang Putih kepikir mungkin lewih apik nek mbojo karo biyunge Bawang Abang supayane Bawang Putih ora dewekan maning. Mula kuwi ramane Bawang Putih mbojo karo biyunge Bawang Abang. Awal mulane biyunge Bawang Abang lan Bawang Abang ulate apik karo Bawang Putih. Nanging suwe-suwe sifat asline keton. Kae kerep ngomei Bawang Putih lan aweh pahalan abot nek ramane Bawang Putih uwis lunga dagang. Bawang Putih kudu lakoni kabeh pahalan umah, nanging Bawang Abang lan biyunge mung males-malesan. Ramane Bawang Putih ora ngerti tindakan mau, wong Bawang Putih ora tau wadul.

Sawijining ramane Bawang Putih lara lan ninggal dunia. Mulai Wektu kuwi Bawang Abang lan biyunge sing nguwasani kabeh lan gawe ulah semena-mena karo Bawang Putih. Bawang putih ora tau leren. Bawang Putih kudu uwis tangi nalika urung subuh, kanggo nyiapake banyu adus lan sarapan kanggo Bawang Abang lan biyunge. Banjur Bawang Putih kudu aweh pakan kanggo ternake, nyirami kebon lan masui klambi marang kali gedhe. Sawise banjur nggosok klambi, beberes omah, lan isih akeh pahalan liyane. Nanging Bawang Putih seneng lakoni pahalan kuwi, amarga Bawang Putih ngarepake sawijing dina biyung tirine bisa seneng karo dheweke kaya dene anake dhewek.

Esuk iki wis dadi biasane Bawang Putih nggawa keranjang isi klambi sing arep diwasuh ing kali. Karo nembang suara lirih mlaku dalan setapak ing pinggir hutan cilik sing biasa diliwati. Dina kuwi cuacane cerah banget. Bawang Putih cepet-cepet masui kabeh klambi kotor sing digawa. Saking asike, Bawang Putih ora sadar salah siji klambine keli kegawa arus. Siale klambi sing keli klambine biyung tirine sing paling disenengi. Pas sadar, klambine beyung tirine uwis keli adoh. Bawang Putih usaha nyusuri kali kanggo golet klambi mau, nanging ora ketemu. Karo putus asa bali omah banjur cerita karo biyung tirine.

"Dasar crobo!" bentak biyung tirine. "Aku ora peduli, pokoke ko kudu golet klambi kuwi! lan aja wani bali omah seurunge kowe nemokake. Ngerti.?!"

Bawang Putih kepaksa nuruti karepe biyung tirine. Bawang Putih gagean nusuri kali sing kanggo ngumbahi. Srengenge uwis mulai duwur, nanging Bawang Putih durung nemu klambi biyunge. Bawang Putih teliti nggolet klambi biyunge ing saben oyot sing nang pinggir kali, mbokan klambine biyunge kali nang kana. Uwis adoh mlaku lan srengenge wis nang kulon, Bawang Putih weruh tukang angon agi ngadusi kebone. Bawang Putih takon :"Paman, napa priksa wonten rasukan abrit ingkang keli teng riki? amargi kula kudu mekta wangsul rasukan menika."

"Iya cah ayu aku weruh, nek kowe ngolet cepetan, mungkin isih bisa ketemu," wangsulane paman.

"inggih paman, matur nuwun." Bawang Putih nimbali lan gagean mlayu maning nusuri kali.

Dina wis mulai peteng, Bawang Putih uwis putus asa. Sedela maning wengi, sekang kadoan keton cahya lampu sing asale saka omah gubug ing pinggir kali. Bawang Putih gagean mampir omah kuwi lan totok lawang.

"Kulanuwun...!salam Bawang putih. Wong wadon tuwa mbukak lawang.

"Sapa kowe nduk?" takon mbah kuwi.

"Kula Bawang Putih mbah. Wau kula madosi rasukan beyunge kula sing keli. Saniki sampun wengi. Angsal kula tilar teng mriki wengi niki.?" takon Bawang putih.

"Ulih nduk. Apa klambi sing kowe goleti warnane abang?" takon mbahe.

"Nggih mbah, Napa mbahe priksa?" takon Bawang Putih.

"Iya. Mau klambine nyangkut nang ngarep omahku. Sayang, padahal aku seneng klambi kuwi," si mbah ngomong.

"Ya aku pan mbelekna klambi kuwi, tapi cah ayu kudu ngancani aku seminggu nang kene. Uwis suwe aku ora tau kandahan karo sapa-sapa, kepriwe?" njaluke mbahe.

"nggih mbah, kula badhe rencangi mbahe seminggu, napa mbah mboten bosen kalih kula," jawab Bawang Putih kalih mesem.

Seminggu Bawang Putih manggon karo mbah kuwi. Saben dina Bawang Putih rewangi mbah pahal pahalan omah. Temtu mbah mau seneng. Wis seminggu, mbah nyeluk Bawang Putih.

"Nduk, wis seminggu kowe manggon nang kene. Lan aku seneng amarga kowe sregep lan ngabekti. Janjine aku kowe ulih nggawa bali klambi biyungmu. Lan siji maneh, koe ulih milih salah siji kang loro waluh iki kanggo hadiah," omonge mbahe. awale Bawang Putih moh nerima pawehe mbahe tapi dipaksa. Banjur Bawang Putih milih waluh sing cilik. "Kula wedos mboten kiat mbekta sing ageng," omonge Bawang Putih. Mbah mesem lan nganter Bawang Putih tekan ngarep omah.

Dung tekan omah, Bawang Putih ngewehna klambi abang gone biyung tirine, banjur Bawang Putih lunga neng dapur arep mbelah waluh kuning mau. Banget kagete Bawang Putih nalika waluk kuwi kebelah, njerone isine emas permata akeh banget. Bawang Putih njetit saking senenge lan aweh ngerti kejadian kuwi marang biyung tirine lan Bawang Abang karo serakah langsung ngrebut emas permata kuwi. Kabeh maksa Bawang Putih nyeritakake kepriye bisa olih hadiah ki. bawang Putih langsung cerita apa anane.

Ngrungu ceritane Bawang Putih, Bawang Abang lan biyunge nduweni rencana kanggo nglakokake apa sing lakokake Bawang Putih nanging saiki Bawang Abang sing pan mangkat. Bawang Abang langsung maring omah mbah tuwa nang pinggir kali. Kaya Bawang Putih, Bawang Abang dijaluki manggon seminggu kanggo ngancani. ora kaya Bawang Putih sing sregep, selama seminggu Bawang Abang gur males-malesan. Umpama pahal ya pahalane ora tau beres lan dipahali asal-asalan. Uwis seminggu mbah ngolihna Bawang Abang mulih.

"Bilih Mbah maringi waluh dateng kulokangge hadiah sampun ngrencangi seminggu?" takon Bawang Abang. Mbah mau kepaksa prentah Bawang Abag milih salah siji kang loro waluh sing ditawarake. Gagean Bawang Abang njimot waluh sing gedhe lan tanpa ngucapaken maturnuwun, mbah geleng-geleng trus lunga.

Tekan omah Bawang abang langsung nemoni biyunge lan karo senenge ndelengaken waluh sing digawa. Amarga wedi Bawang Putih njaluk bagian, prentah Bawang Putih lunga ning kali. Banjur ora sabar waluh dibelah. Nanging udu emas permata sing metu seka waluh kuwi, nanging kewan-kewan wisanen kaya ula, kalajengking lan liyane. Kewan-kewan mau langsung nyerang Bawang Abang lan biyunge kanthi mati. Kuwi walesan kanggo wong sing serakah.

Sumber :

http://kumpulanceritajawa.blogspot.com/2009/03/bawang-abang-bawang-putih.html